இலங்கை மகளிர் அணிக்கு எதிரான ஆசிய விளையாட்டு இறுதிப் போட்டியில் இந்திய மகளிர் அணி 147 ரன்கள் வித்தியாசத்தில் அபார வெற்றி பெற்றது.
ஜப்பானில் நடைபெற்று வரும் ஆசிய விளையாட்டுப் போட்டிகள் விறுவிறுப்பான கட்டத்தை எட்டியுள்ளன. இதில் இன்று (செப்டம்பர் 22) நடைபெற்ற மகளிர் கிரிக்கெட் இறுதிப் போட்டியில், இந்திய மகளிர் அணி இலங்கை மகளிர் அணியை எதிர்கொண்டது. இப்போட்டியில் டாஸ் வென்ற இந்திய மகளிர் அணி முதலில் பேட்டிங் செய்வதாக அறிவித்தது. அதன்படி களமிறங்கிய இந்திய அணிக்கு ஸ்மிருதி மந்தனா – ஷஃபாலி வர்மா இணை அதிரடியான தொடக்கத்தைக் கொடுத்தது. இந்திய அணி முதல் விக்கெட்டுக்கு 99 ரன்கள் எடுத்திருந்தபோது ஷபாலி வர்மா 48 ரன்னில் ஆட்டம் இழந்தார். 28 பந்தில் 3 சிக்சர், 3 பவுண்டரி உள்பட 48 ரன்களைக் குவித்தார்.
அவரைத் தொடர்ந்து, 45 பந்துகளில் 7 சிக்ஸர்கள் மற்றும் 5 பவுண்டரிகளுடன் 79 ரன்கள் குவித்திருந்த ஸ்மிருதி மந்தனாவும் ஆட்டமிழந்து, சதம் அடிக்கும் வாய்ப்பைத் தவறவிட்டார். அதன்பின் களமிறங்கிய ரிச்சா கோஷ், இறுதிவரை ஆட்டமிழக்காமல் 22 பந்துகளில் 3 சிக்ஸர்கள், 5 பவுண்டரிகளுடன் 49 ரன்கள் குவித்து அதிரடியான ஃபினிஷிங்கைக் கொடுத்தார். இறுதியில், இந்திய அணி 20 ஓவரில் 3 விக்கெட் இழப்புக்கு 216 ரன்களைக் குவித்தது.
இதையடுத்து, 217 ரன்கள் எடுத்தால் வெற்றி என்ற இமாலய இலக்குடன் இலங்கை களமிறங்கியது. இலங்கை அணி ஆரம்பம் முதலே இந்திய அணியின் பந்துவீச்சை எதிர்கொள்ள முடியாமல் தடுமாறியது. 15.4 ஓவர்களில் 69 ரன்களுக்கு இலங்கை அணி ஆல்-அவுட் ஆனது. அந்த அணியில் அதிகபட்சமாக கேப்டன் சமாரி அதபத்து மட்டும் 21 பந்துகளில் 29 ரன்கள் எடுத்தார். மேலும் கவிஷா தில்ஹாரி 13 பந்துகளில் 11 ரன்கள் எடுத்தனர். மீதமுள்ள வீராங்கனைகள் சொற்ப ரன்களில் ஆட்டமிழந்தனர். இந்திய அணி சார்பில் தீப்தி சர்மா 3 விக்கெட்டுகளையும், ஷ்ரேயங்கா பாட்டீல், ஸ்ரீ சரணி மற்றும் ஷபாலி வர்மா ஆகியோர் தலா 2 விக்கெட்டுகளையும் வீழ்த்தினர். இதன் மூலம் இந்தியா 147 ரன்கள் வித்தியாசத்தில் அபார வெற்றி பெற்று தங்கப்பதக்கத்தை கைப்பற்றியது.
இந்த வெற்றியின் மூலம் ஆசிய விளையாட்டுப் போட்டிகளில் இந்திய மகளிர் அணி தங்கம் வென்று வரலாற்றுச் சாதனை படைத்துள்ளது. நடப்பு ஆசிய விளையாட்டுப் போட்டிகளில் இந்தியா வெல்லும் முதல் தங்கப் பதக்கம் இதுவாகும். இந்த வரலாற்றுச் சிறப்புமிக்க வெற்றியை அடுத்து, பல்வேறு தரப்பில் இருந்தும் இந்திய மகளிர் அணிக்கு வாழ்த்துகள் குவிந்து வருகின்றன.
