இந்தியா 7.8 சதவீத ஜிடிபி வளர்ச்சி விகிதத்தை எட்டியதற்காகப் பிரதமர் நரேந்திர மோடி மக்களைப் பாராட்டியுள்ளார்
இது தொடர்பாக இந்திய பிரதமர் நரேந்திர மோடி இன்ஸ்டாகிராமில் வெளியிட்ட காணொலி செய்தியில்,“ மக்கள் சுதேசி மற்றும் சுயசார்பு ஆகியவற்றிற்குத் தொடர்ந்து முக்கியத்துவம் அளித்தால், சுதந்திரத்தின் 100-வது ஆண்டில் நாட்டின் இளைஞர்களுக்கு ஒரு வளர்ந்த இந்தியா கிடைக்கும். மேலும், அவசியமின்றி வெளிநாடுகளுக்குச் சுற்றுலா செல்வதையோ, வெளிநாடுகளில் திருமணங்களை நடத்துவதையோ அல்லது தங்கம் வாங்குவதையோ தவிர்க்க வேண்டும்.
7.8 சதவீத ஜிடிபி வளர்ச்சியை எட்டியதற்காக நாட்டின் மக்களை நான் பாராட்ட விரும்புகிறேன். மக்களின் கூட்டு உறுதிப்பாடு மற்றும் முயற்சிகளால் இது சாத்தியமானது. மோதல்கள், போர்கள் மற்றும் நிலையற்ற சூழல் நிலவும் நிலையிலும் இந்தியா இந்த மைல்கல்லை எட்டியுள்ளது.
கடந்த 2020-ம் ஆண்டு கோவிட் பெருந்தொற்று ஏற்பட்டதிலிருந்து எங்கும் நிலையான சூழல் இல்லை என்றாலும், இந்தியா சிறப்பாக முன்னேறியுள்ளது. இந்தியாவில் சிலர் எதிர்மறை எண்ணங்களையும் பொய்களையும் பரப்ப முயன்றாலும், நாடு தொடர்ந்து வளர்ந்து வருகிறது. நமது வளர்ச்சியின் வேகத்தைத் தக்கவைக்க வேண்டும். நாம் வளர வேண்டும். அதற்கு நாம் சுயசார்பு கொண்டவர்களாக மாற வேண்டும். இளைஞர்களின் கனவுகள் நனவாக நமது கடின உழைப்பு தேவை. முயற்சிகளில் நாம் எந்தக் குறையும் வைக்கக்கூடாது. மத்திய அரசின் கொள்கைகள் சிறந்தவை மற்றும் அவற்றின் நோக்கங்கள் தெளிவானவை. அதனால் தான் நாடு வளர்ச்சியில் புதிய உயரங்களை எட்டி வருகிறது” என்று கூறினார்.
மேற்கு ஆசியாவில் நிலவும் போர்ச் சூழலால் பொருளாதார மந்தநிலை ஏற்படும் என்ற கவலைகளுக்கு மத்தியிலும், ஏப்ரல்-ஜூன் காலாண்டில் இந்தியாவின் பொருளாதாரம் எதிர்பார்ப்பை விட அதிகமாக 7.8 சதவீத வளர்ச்சியைப் பதிவு செய்துள்ளது. முந்தைய காலாண்டில் இருந்த 8.6 சதவீத என்ற மிக உயர்ந்த வளர்ச்சியிலிருந்து 2026-27 நிதியாண்டின் முதல் காலாண்டில் வளர்ச்சி வேகம் சற்று குறைந்திருந்தாலும், மோதல் சூழலால் எரிசக்திச் சந்தைகள் பாதிக்கப்பட்ட நிலையிலும், இந்த வளர்ச்சி விகிதம் எதிர்பார்ப்புகளை விட அதிகமாகவே இருந்தது.
