பக்தியிசை பரப்பிய பாவலர்கள் 11… ஆபிரகாம் பண்டிதர்

தமிழ்நாடு சட்டமன்றத் தேர்தலுக்கு முன்பாக மதுரை முடுவார்பட்டியில் நடைபெற்ற கோயில் திருவிழாவிற்குப் போயிருந்தேன். போகும் வழியெங்கும் 15 முதல் 17 வயதுக்குட்பட்ட சிறுவர்கள் பலர் கபடி விளையாடிக் கொண்டிருந்தனர். இவர்களைப் பார்த்தவுடன் ‘ரியல் ராயல்’ அணி நினைவிற்கு வந்து விட்டது.

மதுரை கோ.புதூர் தேசிய விநாயகர் கோயில் தெருவில் வசித்த போது, நாங்கள் ஒரு கபடி அணியை உருவாக்கினோம். அதற்கான மைதானம் கட்டாந்தரை என்பதால், புதூர் கனரா வங்கி பின்புறத்தில் இருந்த வயல் பகுதியில் கிராதி வெட்டி எடுத்து வந்து கபடி மைதானத்தை பச்சை பசேலென மாற்றினோம். அன்றாடம் தண்ணீர் ஊற்றி பசுமையைப் பாதுகாத்து வந்தோம். அதில் கபடி விளையாடும் போது வால்ட் அடித்தாலும் அடிபடாது என்பதால் இந்த ஏற்பாடு.

மதுரை மாவட்ட கபடி அணியில் இடம் பெற்றிருந்த அப்துல் நாசர் தான் எங்கள் கோச்சர். ஆச்சரியம் என்னவென்றால், மாநில அளவில் கால்பந்தாட்ட வீரராக இருந்த நாசர், நண்பர்களின் கோரிக்கையை ஏற்று கபடி வீரராக மாறி முத்திரை பதித்தார். முரட்டுத்தனமாக கபடி விளையாடுபவர்கள் மத்தியில்,. டெக்னிக்கல் வகையில் எப்படி விளையாடுவது எங்களுக்கு பயற்சியளித்த குரு அவர் தான். ஒவ்வொரு நாளும் மாலையாகி விட்டால், கபடி மைதானத்தை சுற்றி அவ்வளவு கூட்டம் கூடி விடும். நாங்கள் பயிற்சி எடுப்பதை பார்ப்பதுடன் எங்களை உற்சாகப்படுத்தும் எங்கள் அனைவரின் குடும்பத்தைச் சேர்ந்தவர்கள் தான் அந்த பார்வையாளர்கள்.மதுரை மாவட்டத்தின் பல்வேறு பகுதிகளுக்குச் சென்று கபடி போட்டியில் வெற்றி பெற்று பரிசுகள் பெற ஆரம்பித்தோம்.

அந்த மைதானத்திற்கு எதிரே கணேசன் வீடு இருந்தது. கபடி விளையாடி களைத்தவுடன் அந்த வீட்டிற்குச் சென்று தான் தண்ணீர் குடிப்போம். நாங்கள் அந்த வீட்டிற்குச் செல்லும் போதெல்லாம், அருமையான பாடல் ஒலிக்கும். கணேசனின் அக்கா தான் பாடிக்கொண்டிருப்பார். இசையரசி பி.சுசீலாவின் ரசிகை அவர். அவர் பெயரும் சுசீலா தான். ‘அமுதை பொழியும் நிலவே நீ அருகில் வராததேனோ’ பாடலை அவர் பாட ஆரம்பித்தவுடன் அங்கேயே அமர்ந்து விடுவேன். அவ்வளவு அட்சர சுத்தமாக சுசீலா அக்கா பாடுவார். சிறுவயதில் இருந்து பாடல்கள் கேட்டு வளர்ந்தவன் என்பதால், இசைபித்து என்னை பல இடங்களில் என்னைக் கட்டிப்போட்டு விடும். அப்படி ஒரு இடம் சுசீலா அக்கா வீடு.

இதயம் மேவிய காதலினாலே
ஏங்கிடும் அல்லியை பாராய்..ஆ…
இதயம் மேவிய காதலினாலே
ஏங்கிடும் அல்லியை பாராய்
புது மலர் வீணே வாடிவிடாமல்
புது மலர் வீணே வாடிவிடாமல்
புன்னகை வீசி ஆறுதல் கூற
அருகில் வராததேனோ
அருகில் வராததேனோ

நிலவை வரச்சொல்லி சுசீலா அக்கா பாடுவதை நாள் முழுவதும் கேட்டுக் கொண்டேயிருக்கலாம். அவர் எனக்குத் தூரத்து உறவினர். என் அக்காக்களுடன் ரிசவர்லைன் மாரியம்மன் கோயிலுக்குச் செல்வார். அவருடைய தலையில் மெல்ல மெல்ல வெள்ளை முடி எட்டிப்பார்க்க ஆரம்பித்தது.எத்தனையோ பேர் அவரை பெண் பார்த்தும் நீண்ட நாட்களாக திருமணம் நடக்கவில்லை. நீள நீள வெள்ளிக் கம்பிகளாய் மாறி விட்ட கூந்தலை சீவிக் கொண்டே சுசீலா அக்கா பாடிக்கொண்டிருந்தார். அத்துடன் மெலிந்து ஆளே அடையாளம் தெரியாமல் போனார். திடீரென ஒருநாள் கிறிஸ்தவ மதத்திற்கு அவர் குடும்பம் மாறி விட்டது. இதன் பின் அவர் வீட்டிற்குச் செல்லும் போது கிறிஸ்தவ பாடல்களை டைரியில் எழுதி வைத்துப் பாடிக் கொண்டிருப்பார்.

தந்தானை துதிப்போமே
தந்தானைத் துதிப்போமே – திருச்
சபையாரே கவி பாடிப்பாடி
தந்தானைத் துதிப்போமே…
விந்தையாய் நமக்கனந்தனந்தமான
விள்ளற்கரியதோர் நன்மை மிக மிக…

சேர்ந்திசை பாடலுக்குரிய மெட்டு என்றாலும் சுசீலா அக்கா குரலில் இந்த பாடலைக் கேட்பது ஒரு சந்தோஷம். களைத்துப் போயிருந்தாலும், பாடலைப் பாடும் போது எங்கிருந்து அவருக்கு இந்த தெம்பு வருகிறது எனத்தெரியாது. பாடகி ஜிக்கி பாடுவதற்கு முன்பே ‘தந்தானை துதிப்போமே’ பாடலைப் பாடியவர் பாரதி பால். 1935-ம் ஆண்டு பிறந்த பாரதி பால், தூத்துக்குடி மாவட்டத்தைச் சேர்ந்தவர்.

பாரதி பால்

இவரது தந்தை சென்னை பல்கலைக்கழகத்தில் பேராசிரியராக பணியாற்றியவர். கிறிஸ்தவ குடும்பத்தைச் சேர்ந்தவர் என்றாலும் தனது மகளுக்கு பாரதியின் பெயரை அவரது தந்தை சூட்டினார். இவர் பள்ளியில் படிக்கும் போதே வீணை, கர்நாடக இசை, பரதநாட்டியம் ஆகியவற்றை கற்றுத் தேர்ந்தார். 1960-ம் ஆண்டுகளில் பாடத் தொடங்கிய பாரதி பால், சுமார் 72 பாடல்களைப் பாடியுள்ளார். இன்றளவும் கிறிஸ்தவ குடும்பங்களில் பாடப்படும் திருமண பாடல்களின் முன்னோடி பாரதி பால் தான். அவர் பாடிய ஆதாரனைப் பாடல்கள் காலம் கடந்தும் கிறிஸ்தவ மக்களால் இன்றும் கொண்டாடப்படுகிறது. அதன் காரணமாக நியூசிலாந்தில் உள்ள ஆக்லாந்து இறை இசை வானொலி நிலையம் ‘கிறிஸ்தவ பாடலின் நைட்டிங்கேல்’ என்று பாரதி பாலுக்கு பட்டம் வழங்கியது

வே.மாசிலாமணி

அவர் பாடிய ‘தந்தானை துதிப்போமே’ பாடலை எழுதியவர் திண்டுக்கல் மாவட்டம், வத்தலக்குண்டு அருகில் உள்ள சிலுக்குவார்பட்டியைச் சேர்ந்த நற்செய்தியாளர் வே.மாசிலாமணி. மதுரையில் பள்ளி படிப்பு, கல்லூரி படிப்பை முடித்த வே.மாசிலாமணி திருக்கோவிலூரில் உள்ள பள்ளியில் தலைமை ஆசிரியராக பணியாற்றியவர்.

தமிழ் இலக்கியங்களில், குறிப்பாக நாட்டுப்புற இலக்கியங்களில் ஈடுபாடு கொண்ட வே.மாசிலாமணி, திருவண்ணாமலையில் போதகராக செயல்பட்டார். கர்நாடக இசையில் நாட்டம் கொண்ட வே.மாசிலாமணி, இசைக்கருவிகளை வாசிக்கத் தெரிந்தவர். திருவிழாக்களிலும், வாரச்சந்தையிலும் பாடல்களைப் பாடிக் கொண்டே நற்செய்திகளைக் கொண்டு சென்றவர். இவர் எழுதிய ‘தந்தானை துதிப்போமே’ பாடல் மட்டுமின்றி ‘ஒய்யாரத்துச் சீயோனே நீயும்’, ‘ஆர் இவர் ஆராரோ
ஆர் இவர் ஆராரோ’ பாடல்கள் புகழ்பெற்றவை. இசையமைப்பாளர் டி.ஏ.கல்யாணம் இசையில் இப்பாடல்கள் ஒலிப்பதிவு செய்யப்பட்டன.

சுசீலா அக்கா ஒருநாள் தனது வீட்டினைச் சுற்றி அமர வைத்துக் கொண்டு பாடிக் கொண்டிருந்தார்.

கண்டேன் என் கண்குளிர – கர்த்தனையின்று
கொண்டாடும் விண்ணோர்கள் கோமானைக் கையிலேந்தி
கண்டேன் என் கண்குளிர – கர்த்தனையின்று

பெத்தலேம் சத்திர முன்னணையில்
உற்றோருக் குயிர்தரும் உண்மையாம் என் ரட்சகனைக்
கண்டேன் என் கண்குளிர

தேவாதி தேவனை, தேவசேனை
ஓயாது – தோத்தரிக்கும் ஒப்புநிகர் அற்றவனைக்
கண்டேன் என் கண்குளிர…

இசைக்கருவி இல்லாமல் எப்படி இவரால் பாடல்களை பாடமுடிகிறது என்று நினைப்பேன். நான் படித்த ஆர்.சி.பள்ளியில் கிறிஸ்துமஸ் விழா நடைபெற்ற போது இந்த பாடலைக் கேட்டுள்ளேன். அதன் பின் சுசீலா அக்கா குரலில் தான் கேட்டேன். இந்த பாடலை இயற்றியவர் இசைமேதை ஆபிரகாம் பண்டிதர். ஒன்றுபட்ட திருநெல்வேலி மாவட்டத்திலுள்ள சாம்பவர் வடகரை கிராமத்தில் எளிய குடும்பத்தில் பிறந்தவர். தமிழ் மருத்துவத்தில் அளவு கடந்த ஆர்வம் கொண்டிருந்த இவர், மூலிகைகளைப் பயன்படுத்தி ‘கருணானந்தர் சஞ்சீவி மருந்துகள்’ என்ற பெயரில் பல்வேறு சித்த மருந்துகளைத் தயாரித்தார். பிரிட்டிஷ் அரசு இவரது சேவையைப் பாராட்டி ‘ராவ்பகதூர்’ பட்டம் வழங்கியது.

தமிழ் மருத்துவத்தில் மட்டுமல்ல, தமிழிசையிலும் ஆபிரகாம் பண்டிதர் சிறந்து விளங்கினார்.தஞ்சாவூரில் தமிழ் ஆசிரியராக பணியாற்றினார். முதன்முதலாக அகில இந்திய இசை மாநாட்டைத் தஞ்சாவூரில் நடத்தினார். தனது பல்லாண்டு கால தமிழிசை ஆராய்ச்சி முடிவுகளை ‘கருணாமிர்தசாகரத் திரட்டு’ என்ற இசை நூலாகத் தொகுத்து, 1917-ல் வெளியிட்டார். தமிழிசை வரலாறு, தமிழ் மருத்துவம், இசையாளர்கள் குறித்த ஒரு கலைக்களஞ்சியமாக இது போற்றப்படுகிறது. புதுப்புது வகைப் பயிர்களை வேளாண்மை செய்வதிலும், காற்றாலைகளை நிறுவி நீர்ப்பாசனம் செய்வதிலும் ஆர்வத்துடன் ஈடுபட்டார். 1911-ல் மின்சாரத்தில் இயங்கும் அச்சுக்கூடம் ஒன்றை நிறுவினார்.தமிழிசை இயக்கத்தின் முன்னோடியான ஆபிரகாம் பண்டிதர் பாடல்களை இயற்றுவதில் வல்லவர்.

இல்லான் எந்தனுக்கு என்றும் நிறைவாய்
எல்லாம் தந்த உன்னை என்றும் துதிப்பேன்…

என்று அவர் எழுதிய கிறிஸ்துமஸ் பாடல், டி.ஏ.ஜி.துரைப்பாண்டியன் இசையில் தேவிகா ஜெயசிங் குரலில் பதிவு செய்யப்பட்டது. ஆபிரகாம் பண்டிதர் எழுதிய ‘வரம் தரவே வா வா தேவா’ என்ற பாடல் மிகச்சிறந்த கர்நாடக இசையை அடிப்படையாக கொண்டது. தமிழ்நாட்டில் திருமண வீடுகளில் மணப்பெண்ணை வரவேற்க ‘பாசமலர்’ படத்தில் இடம் பெற்ற

வாராய் என் தோழி வாராயோ
மணப்பந்தல் காண வாராயோ

பாடலை ஒலிக்கச் செய்வார்கள். ஆனால், அதே காலக்கட்டத்தில் கிறிஸ்தவ குடும்பங்களில் மணமக்களை வரவேற்க ஆபிரகாம் பண்டிதர் எழுதிய ஒரு பாடலைத்தான் ஒலிபரப்பு செய்துள்ளனர்.

ஸ்ரீமா தேவா
திருவருள் புரிய இத்தருணமிங்கு நீயும் வா

சுந்தரமாய் வானம் பூமி ஜோதி படைத்து
சந்ததமாய் ஏதேன் வாழ யாவும் கொடுத்து
சிந்தை களிகூர ஆசீர்வாதம் கொடுத்து
தினமும் அவரோடு கூடிக் குலாவ வந்தாயே – ஸ்ரீ மா

மிக அழகாக மெட்டமைக்கப்பட்ட இந்த பாடல், கிறிஸ்தவ முறை திருமணங்களின் இன்றளவும் தவிர்க்க முடியாததாய் மாறியுள்ளது. இப்படி அற்புதமான பாடல்களை பல பாடல்களை ஆபிரகாம் பண்டிதர் எழுதியுள்ளார். கிறிஸ்தவ பக்திப் பாடல்களை எழுதிய மற்றொரு சிறந்த கவிஞர் ஞானமணி. இவர் எளிய வடிவத்தில் வார்த்தைகளைக் கொண்டு இவர் எழுதிய பாடல்கள் சாகாவரம் பெற்றவை.

எல்லாம் ஏசுவே
எல்லாம் இயேசுவை எனக்கெல்லா மேசுவை
தொல்லைமிகும் இவ்வுலகில் துணை யேசுவை
ஆயனும் சகாயனும் நேயனும் உபாயனும்
நாயனும் எனக்கன்பான ஞானமண வாளனும்…

என்ற ஜிக்கி குரலில் ஒலித்த இந்த பாடல் ஞானமணி எழுதியது. 1964-ம் ஆண்டு பதிவு செய்யப்பட்டு இசைத்தட்டாக வெளிவந்து பெரும் வரவேற்பைப் பெற்றது. நான் சிறுவனாக இருந்த போது புதூர் லூர்தன்னை திருத்தலத்தில் இப்பாடலைக் கேட்டுள்ளேன். ஏனென்றால் அங்கு தான் என் பள்ளியின் வகுப்பறை இருந்தது. ஒவ்வொரு நாளும் விதவிதமான பாடல்களைக் கேட்க எனக்கு வாய்ப்பு கிட்டியது. ராமஜெயம் எழுதுவது போல இயேசுவின் திருநாமத்தை வைத்து ஞானமணி அற்புதமான பாடலை எழுதியுள்ளார். சாம் ஜோசப் இசையில் பாரதி பால் பாடிய அந்த புகழ் பெற்ற பாடல்,

இயேசுவின் நாமமே திருநாமம் – முழு
இருதயத்தால் தொழுவோம் நாமும்…
காசினியில் அதனுக் கிணையில்லையே – விசு
வாசித்த வர்களுக்குக் குறையில்லையே…

இன்றளவும் இந்த பாடல் உயிர்ப்புடன் இருப்பதற்கு காரணம் எளிய வரிகள் தான். என் பள்ளி ஆசிரியை வகுப்பறையில் சில நேரங்களில், ஒரு வார்த்தையை பாடிக்கொண்டே இருப்பார். ‘இவர் தான், இவர் தான்’ என்ற வார்த்தைகளைத் தவிர எனக்கு வேறு எதுவும் புரியாது. நீண்ட நாட்கள் கழித்து அந்த பாடல் ஜிக்கி பாடிய கிறிஸ்தவ பாடல் என்பதை அறிந்து கொண்டேன். ‘இவர் தான்’ என்ற சொல்லை வைத்து இப்படி ஒரு பாடலை எழுத முடியுமா என்று ஆச்சரியப்பட வைத்தது.

சமாதானம் ஓதும் ஏசுகிறிஸ்து
இவர் தாம் இவர் தாம் இவர் தாம்
நம் தாதி பிதாவின் திருப்பாலர் இவர்
அனுகூலர் இவர் மனுவேலர் இவர் -சமாதானம்

மிகச்சிறந்த இசைமெட்டுடன் உருவாக்கப்பட்ட இந்த பாடலை எழுதியவர் கிறிஸ்தவ தமிழறிஞர் வேதநாயகம் சாஸ்திரியார். கிறிஸ்தவக் காப்பியமான ‘நோவாவின் கப்பல் பாட்டு’ எழுதிய பேரறிஞர். தஞ்சையை ஆண்ட மராட்டிய மன்னரின் மகனான நான்காவது சரபோஜியும் வேதநாயகம் சாஸ்திரியாருடன் கல்வி பயின்றவர். அத்துடன் அவரின் அரசவையில் புலவராக இருந்தவர்.

வேதநாயகம் சாஸ்திரியார்

திருநெல்வேலியில் ஆரம்பக் கல்வியையும், தஞ்சாவூரில் உயர் கல்வியையும் கற்ற வேதநாயகம், தரங்கம்பாடியில் உள்ள இறையியல் கல்லூரியில் படித்தவர். இவர் எழுதிய முதல் நூல்பெத்லகேம் குறவஞ்சி. சைவ, வைணவ கதாகாலட்சபேங்களைக் கேட்டு கிறித்தவ சமயக் கருத்துகளை கதாகாலட்சேபமாக தமிழகத்தின் பல பகுதிகளில் நடத்தினார். இவருடைய பாடல்கள் கர்நாடக இசையையும் தமிழக நாட்டாரிசையையும் இணைத்து உருவாக்கப்பட்டவை.

இன்றளவும் கிறிஸ்தவ ஆலயங்களில் பாடப்படும் கிறிஸ்தவ சமயக் கீர்த்தனைகளில் பெரும்பாலானவை வேதநாயகம் சாஸ்திரியால் பாடப்பட்டவை தான்.

சீர் இயேசு நாதனுக்கு ஜெயமங்களம் ஆதி
திரியேக நாதனுக்கு சுபமங்களம்

பாரேறு நீதனுக்கு பரம பொற்பாதனுக்கு
நேரேறு போதனுக்கு நித்திய சங்கீதனுக்கு…

ஆதி சரு வேசனுக்கு ஈசனுக்கு மங்களம்
அகிலப் பிரகாசனுக்கு நேசனுக்கு மங்களம்
நீதிபரன் பாலனுக்கு நித்திய குணாலனுக்கு
ஓதும் அனுகூலனுக்கு உயர் மனுவேலனுக்கு

என்ற மங்கள வாழ்த்துப் பாடல் வேதநாயகம் சாஸ்திரியார் எழுதிய பெத்லகேம் குறவஞ்சியில் இடம் பெற்றது தான். பிரபல பாடகி ஏ.பி.கோமளா குரலில் ஒலித்த இந்த பாடல், ஒலித்தட்டு விற்பனையில் மிகப்பெரிய சாதனையைப் புரிந்தது. ‘வேதாகம சிரோமணி மகாஞானக் கவிச்சக்கரவர்த்தியார்’ என்ற பட்டம் பெற்ற வேதநாயகம் சாஸ்திரியார், நானூறுக்கும் மேற்பட்ட தனிப்பாடல்களையும், 133 நூல்களையும் எழுதியுள்ளார். இயேசு கிறிஸ்து பிறந்ததையொட்டி அவர் எழுதிய

ஆதி திருவார்த்தை திவ்ய
அற்புத பாலனாக பிறந்தார்
ஆதாம் தம் பாவத்தில் சாபத்தை தீர்த்திட
ஆதிரையோரை யீடேற்றிட…

பாடல் ஜிக்கியின் குரலில் பதிவு செய்யப்பட்டது. டி.ஏ.கல்யாணம் இசையில் உருவாக்கப்பட்ட இந்த பாடலில்,

தாம் தாம் தன்னர வன்னர
தீம் தீன் தீமையகற்றிட
சங்கிர்த சங்கிர்த சங்கிர்த சந்தோ

ஷமென சோபனம் பாடவே
இங்கீர்த் இங்கீர்த் இங்கீர்த் நமது
இருதயத்திலும் எங்கும் நிறைந்திட

என்று இசை நுணுக்கமாய் எழுதப்பட்டுள்ளது. வேதநாயகம் சாஸ்திரியார் எழுதிய பாடல்கள் அனைத்தும் இசைவடிங்களாக மாற்றப்பட்டுள்ளன.

ஜிக்கி

அவர் வாழ்ந்த காலமென்பது 1774-ம் ஆண்டு முதல் 1864-ம் ஆண்டு வரையாகும். ஆனால், அவர் எழுதிய

பாடித் துதி மனமே பரனைக்
கொண்டாடித் துதி தினமே
நீடித்த காலமதாகப் பரன் எமை
நேசித்த பட்சத்தை வாசித்து வாசித்து…

பாடல் இறைநேசர்களால் இன்றளவும் கொண்டாடப்படுகிறது. அதிமங்கள காரணனே,பாரில் உன்னை அன்றி யாரோ,எந்தன் இதயம் எழுச்சியடைந்திட வா வா, தீய மனதை மாற்ற வாரும் தூய ஆவியே, நீயுனக்கு சொந்தமல்லவே,என்ன என் ஆனந்தம் என்ன என் ஆனந்தம், திரிமுதல் கிருபாசனனே சரணம், ஆமென் அல்லேலூயா! மகத்துவத் தம்பராபரா, சுந்தரப் பரம தேவமைந்தன், யூத ராஜ சிங்கம் உயிர்த்தெழுந்தார், ஆத்துமமே என் முழு உள்ளமே, வானமும் பூமியும் மலைப்பள்ளத்தாக்கும். ஆபிரகாமை ஆசீர்வதித்த ஆண்டவா அருளுமே. இன்று இயேசு உயிர்த்தெழுந்தார், நம் தேவனைத் துதித்துப்பாடி,எங்கும் புகழ் இயேசு இராஜனுக்கே என்று எத்தனை எத்தனையோ பாடல்களை சுசீலா அக்கா பாடிக் கேட்டிருக்கிறேன்.

தேவவரம் பிடல்ப்ட் முன்ஷியர்,ஜோ அடைக்கலம்,:வின்பிரட் போதகர்,தேவசகாயம் உபாத்தியார், மரியான் உபதேசியர், தைரியம் ரைட்டர், மேரி லாசரஸ், ல.பொன்னுசாமி உள்பட எண்ணற்றோர் எழுதிய கீர்த்தனைகள் விதவிதமான மெட்டுக்களில் இன்றளவும் கிறிஸ்தவ கானங்களாக உலா வருகின்றன. மதங்களைக் கடந்த இசையை எனக்கு அறிமுகம் செய்து வைத்த சுசீலா அக்காவின் பாடல்கள் தான், இசை ரசனையின் வாசலை எனக்குத் திறந்து வைத்தன.
-ப.கவிதா குமார் ( நினைவுகள் சுழலும்)

1)https://maduraiseithi.in/p-kavitha-kumar-devotional-music-series-part-1/

2)https://maduraiseithi.in/poets-who-propagated-devotional-music-1-m-p-sivam/

3)https://maduraiseithi.in/lyricists-who-popularized-devotional-music-2/

4)https://maduraiseithi.in/poets-who-propagated-devotional-music-3-kovai/

5)https://maduraiseithi.in/lyricists-who-popularized-devotional-music-4/

6)https://maduraiseithi.in/lyricists-who-popularized-devotional-music-5/

7)https://maduraiseithi.in/lyricists-who-popularized-devotional-music-6/

8)https://maduraiseithi.in/lyricists-who-popularized-devotional-music-7/

9)https://maduraiseithi.in/lyricists-who-popularized-devotional-music-8/

10)https://maduraiseithi.in/lyricists-who-popularized-devotional-music-9/

11)https://maduraiseithi.in/lyricists-who-popularized-devotional-music-10/